Stórstjörnurnar þeir Eamonn Boreham og Charlie Cullen frá label.m heimsóttu bpro. 

Í síðustu viku komu stórstjörnur frá label.m í heimsókn til okkar í bpro, þeir Eamonn Boreham og Charlie Cullen. Það er mikil viðurkenning fyrir okkur að fá svona frábæra fagmenn til landsins og forréttindi fyrir hárgreiðslufólk að fá tækifæri til að sækja sér dýpri þekkingu og njóta innblástursins sem þeir Eamonn og Charlie færa okkur.

Dagskráin með þeim var viðburðarík og byrjaði á kraftmikilli viðskiptaþjálfun á laugardagsmorguninn. Þar fengu okkar frábæru viðskiptavinir hvatningu og fræðslu um hvernig þeir geta tekið reksturinn sinn á næsta stig og geta þjónustað viðskiptavini sína á sem faglegastan og bestan hátt.

Um kvöldið tók svo við ,,órafmögnuð” veisla sem var bæði ástríðufull og sjóðheit. Við fengum að sjá brot af öllu því sem faghjartað og hugann lystir og má þar nefna; Men’s, Get the look og Fashion Fix. Þessi þrenning sameinar allt það sem fagfólk óskar eftir.

Harpa Ómarsdóttir eigandi Hárakademíunnar og label.m ambassador Íslands, spilaði lykilhlutverk á sviðinu þar sem hún sýndi Fashion Fix greiðslur.

Þegar hárgreiðslufólk kemur saman á viðburðum sem þessum leiðist engum, enda mikill sjarmi yfir faginu okkar og áttum við saman kraumandi kvöldstund.

Okkur tókst að skapa stemingu sem var í senn notaleg og fjörug en umfram allt fór fólkið okkar út í nóttina stútfullt af nýrri þekkingu og innblæstri.

Við tökum hlutina alla leið í bpro, hér er aldrei nein lognmolla. Það skiptir okkur gríðarlega miklu  máli að veita fagfólki veislu á borð við þessa, enda elskum við það sem við gerum.

Mbkv. - Guðný